Ku musi wa Gatatu igenekerezo rya 28 kigarama 2021, Nyakubahwa Tantine NCUTINAMAGARA, Umwunganizi w’Umushikiranganji wo Gushigikirara, Imibano, Agateka ka Zina Muntu n’Iterambere Ridakumira  yarateye intege abakenyezi bahurikiye mw’ishirahamwe TWIZERE ryo mu Rumonge, ku Mutumba wa ITEBA. Akaba yarashimye intambwe bashitseko mw’iterambere inyuma yaho baronkejwe n’ubwo Bushikiranganji ingurane y’Umuriyoni w’amafaranga y’amarundi, bazosubiza mu kiringo c’imyaka itatu. Nyakubahwa NCUTINAMAGA yarabakeje kuko avuga ko atari abakenyezi bose bafise amikoro make biyumvira kuja hamwe kugirango biteze imbere mu buryo bw’amafaranga canke bw’ikibano ciza.

Yabasavye kubera icitegererezo ciza abandi bakenyezi na burya iryo shirahamwe rimaze kuvyara ayandi abiri.

Yaboneyeho kubibutsa ko igihe cose habaye ikibabakira canke ikibagora, bokwitura  uwuserukira Ubushikiranganji muri komine kugirango abafashe gutora umuti w’ibibazo bimwe boba bagize.

Yabasavye kandi kubandanya bishura neza inguranye baronkejwe kugirango n’ayandi mashirahamwe y’abakenyezi  azoshikirwe.

Yarangije abipfuriza umwaka mushasha mwiza w’2022, anabasaba kudasesagura muri iyo misi mikuru kuko ngo « inda ntuyibwira ico uyihaye, uyibwira ico uyiraije 

NIYONZIMA Zela, umukuru w’umutumba Iteba, akaba yarashinze intehe y ‘ingene abo bakenyezi bamufashije kugera kuri iyo ntambwe yo kwinjira mumabanga yo kurongora uwo mutumba.

Abakenyezi bahurikite muri iryo shiramwe bakaba bishimira intambwe bagezeko bagereranije n’uko bari bifasha batarajahamwe muri iryo shirahamwe.

Umwe muri bo akaba yaravuze ingene bukebuke yagiye aragira urudandaza rw’irengarenga, naho umugabo yari yaramutaye, akaba yarashoboye kw’iteza imbere, akaba ashobora kwigisha abana no kwibesha ata ngoranaye.

Uwundi bakenyezi nawe mu bari aho akaba nawe yarashinze intahe y’ingene yavuye mu ngeso mbi y’ubumaraya, aho yivugiye ko yahora atwara abagabo b’abandi bakenyezi akabamarana munzu amezi abiri canke atatu, ariko ubu kubera kuja hamwe n’abandi bakenyezi, izo ngeso mbi yazivuyemwo, none yishima cane kuko yanaronse n’umugabo wiwe bwite baheruka kwubakana biciye mumategeko.

Abo bakenyezi bakaba bahisemwo kudandaza umunyu, amasabune n’indagara, haruhande y’umugambi w’umwe umwe, baca bagirako basaba kwongererezwa ingurane bahawe na Reta kugirango bakore imigambi yisununuye gusumba.

Kuri ico Nyakubahwa Tantine NCUTINAMAGARA akaba yabasavye kubandanya bakora, kandi babe bariyumvira imigambi ikomeye bokora, kugirango noneho ya banki y’abakenye yashingwa ni yatangura gukora bace baronswa imitahe yisununuye.

Mwomenya ko izo mpanuro yazitanze no muri Komine Bugarama, aho yari yagendeye ishirahamwe MUKENYEZI TUBUMWE

NIBARUTA Delphine, Umukuru w’iryo shirahamwe MUKENYEZI TUBUMWE akaba yarashikirije ingene biyumviriye kuja hamwe babonye ubukene bwari bubugarije.

Yaravuze ingene kera bahora bikumira, bakabura ico bikorako, vyose bakabisaba abagabo babo, none ubu bakora ibitandukanye bakaronka amahera yo kwikenura batarinze kuzera inze canke ngo barindire ko abagabo babo babaha ivyo bakeneye.

Nyakubahwa Musitanteri wa komine BUGARAMA, KARORERO Charles nawe mw’ijambo ry’ikaze, akaba yamenyesheje ko muri iyo komine harangwa amahoro n’umutekano, kiretse ko hari amazu y’abenegihugu yabomotse kubera imvura.

Yavuze kandi ko iyo abakenyezi badakoze, abagabo bonyene batobishobora, aca agirako asaba abo bakenyezi kuzokoresha neza iyo ngurane kugira ni bamara kuyisubiza, iyindi mirwi y’abakenyezi iheze ishikirwe.

Mwomenya ko Ubushikiranganji bwo Gushigikirana, Imibano, Agateka ka Zina Muntu n’Iterambere Ridakumira bwama buriko burahimiriza abenegihugu na cane cane abakenyenzi kuja hamwe mu mashirahamwe n’amakoperative, kugirango bushora kubunganira haba mu kubaronsa inyigisho canke ingurane nk’uko yama yabigize mu makomine agize igihugu cacu.

Source: Ministry of National Solidarity, Social Affairs, Human Rights and Gender

By pr.web

Leave a Reply

Your email address will not be published.